9. ชนปทนามสฺมา ขตฺติยา รญฺเญ จ โณ
ชนปทสฺส ยํ นามํ, ตํ นามสฺมา ขตฺติยา อปจฺเจ รญฺเญ จ โณ โหติฯ ปญฺจาลานํ อปจฺจํ ราชา วา ปญฺจาโล, โกสโล , มาคโธ, โอกฺกาโกฯ ชนปทนามสฺมาติ กิํ, ทาสรถิฯ ขตฺติยาติ กิํ, ปญฺจาลสฺส พฺราหฺมณสฺสา+ปจฺจํ ปญฺจาลิฯ
10. ณฺย กุรุสิวีหิ
กุรุสิวีหิ อปจฺเจ รญฺเญ จ ณฺโย โหติฯ กุรูนํ อปจฺจํ ราชา วา โกรพฺโยฯ ‘‘ยมฺหิ โคสฺส จา’’ติมินา อวง, พการปุพฺพรูปานิฯ เสพฺโพ, อิโลโปฯ (อปจฺจตทฺธิตํ)ฯ
11. ณ ราคา เตน รตฺตํ
ราควาจีตติยนฺตโต รตฺต+มิจฺเจ+ตสฺมิํ อตฺเต โณ โหติฯ กุสุมฺภาทีหิ วณฺณนฺตรปตฺตํ รตฺตํ นามฯ กสาเวน รตฺตํ กาสาวํฯ เอวํ กุสุมฺเภน รตฺตํ โกสุมฺภํ, หาลิทฺทํ, ปตฺตงฺคํ, มญฺเชฏฺฐํ, กุงฺกุมํฯ อิธ น โหติ นีลํ ปีตนฺติ, คุณวจนตฺตา เณน วินาปิ ทพฺพสฺสา+ภิธานโตฯ
12. นกฺขตฺเตนิ+นฺทุยุตฺเตน กาเล
ตติยนฺตโต นกฺขตฺตา เตน ลกฺขิเต กาเล โณ โหติ, ตํ เจ นกฺขตฺต+มินฺทุยุตฺตํ โหติฯ ผุสฺเสน อินฺทุยุตฺเตน ลกฺขิตา ปุณฺณมาสี ผุสฺสี รตฺติ, ผุสฺโส อโห, มฆาย อินฺทุยุตฺตาย ลกฺขิตา ปุณฺณมาสี มาฆี, มาโฆฯ